Screade vuê a Udin la gnove ale dal istitût Malignani, ogjet di lavôrs di ristruturazion impuartants. A jerin doi i lots par une spese in dut di 8,3 milions di euros, che a àn permetût l’adeguament antisismic dal edifici, intervents par ridusi il consum di energjie e la costruzion di 30 aulis su trê plans. Tal semisoterani, invezit, a son stâts preparâts i implants par meti i gnûfs laboratoris di chimiche, che a saran screâts tal an scolastic 2025-2026. De Regjon a son rivâts 2,5 milions di euros, doprâts pai implants e par altris lavôrs.
“La Regjon e va indenant – e à dit l’assessôr regjonâl aes Infrastruturis Cristina Amirante – tal judâ la ricualificazion dai istitûts scolastics sul teritori, lûcs fondamentâi pe cressite des gnovis gjenerazions”.
Ae cerimonie de scree a jerin presints ancje Oliviero Barbieri, dirigjent dal istitût, la diretore dal Edr di Udin Ida Valent e l’assessôr comunâl Federico Pirone. (a.d.g.) – 03.12.2024
