PrimaCassa e à consegnât ae Polizie feroviarie di Glemone un defibriladôr sierant cussì il prin dai trê agns dal progjet “Comunità e montagna in sicurezza”, par dâ plui sigurece al teritori e aes sôs comunitâts.
“O ringracii la bancje di credit cooperatîf – al à dit Roberto Revelant, sindic di Glemone – par vê dât acet ae domande de nestre comunitât a pro de prevenzion. O savìn che chestis azions a son pardabon utilis par salvâ vitis”. “Il progjet – al à dit invezit Giuseppe Graffi Brunoro, president di PrimaCassa Fvg – al è stât pensât cuasi 10 agns indaûr cu la idee di judâ i intervents di prin socors no dome tai lûcs indulà che e je mancul int, ma ancje in chei mancul facii di rivâ. Fin cumò o vin regalât in dute la provincie di Udin plui di 100 defibriladôrs e formadis plui di mil personis”. (a.d.g.) – 05.12.2024
