Si scree martars ai 17 tal Municipi di Mortean la mostre fotografiche dedicade a Bruno Fabretti, “un puint gjenerazionâl e sociâl par une comunitât inclusive”, fate dal circul culturâl Chiarisacco e de associazion La Colone. Bruno Fabretti al è stât testemoni in prime persone dai cjamps di presonie dai naziscj e al è muart a 99 agns tal 2023. In vuere de bande dai partesans, al fo cjapât dai todescs tal mês di Setembar dal 1943 e al fo tai cjamps di concentrament di Lodz, Dachau, Neuengamme, Bergen Belsen e Buchenwald. Tal so libri “Per non dimenticare”, Par no dismenteâ, al veve contât la tristerie e l’orôr di chei lûcs. La mostre a Mortean e je une racuelte di riproduzions des pagjinis dal diari scrit par no dismenteâ chê tremende esperience. Vie pe scree de mostre, vierte fint ai 25 di Zenâr, e sarà ancje un tic di musiche de corâl La Colone direte di Giuseppe Tirelli. (A.I.) – 16.12.2024
Foto di L. d’Agostino
