Pupi Avati, un grant regjist si conte sul palc

Il Teatri “Adelaide Ristori” di Cividât al da acet a une altre serade in esclusive regjonâl. Dopo il monolic di Debora Caprioglio su Artemisiea Gentileschi, joibe ai 19 il teatri al ospitarà, inte suaze de stagjon promovude dal circuit dal ERT e de aministrazion comunâl, “Pupi Avati si racconta”. Il regjist, autôr di passe 54 peliculis che al à segnât la storie dal cine talian cun oparis di no podê dismenteâ, al larà sù sul palc par contâsi acompagnât di un rafinât grup jazz formât di Teo Ciavarella (piano), Checco Coniglio (trombon), Alfredo Ferrario (clarinet) e Francesco Angiuli (liron). Al è un avigniment che al messede autobiografie, cine e musiche, instreçant storiis e fatarei personâi cui grancj acjadiments culturâi e sociâi dal Nûfcent talian. La musiche jazz, i incuintris straordenaris, la amicizie, lis peliculis iconichis e la storie di Italie si fondin intune conte uniche, che e promet di emozionâ e di ispirâ. (A.I.) – 17.12.2024