E je stade rimandade par vie de muart di un dai organizadôrs la cerimonie di inaugurazion de mostre “Elio Ciol. Sguardi nel tempo”, un avigniment che al celebre la cariere straordenarie di un dai mestris plui grancj de fotografie taliane. La mostre, ospitade intes ex presons dal Cjistiel di Glemone, si vierzarà al public dut câs vinars ai 20 e e restarà visitabil fint ai 15 di Jugn dal an che al ven, dal vinars ae domenie. La conference introdutive, che e previodeve la partecipazion dal mestri Ciol, des autoritâts e dai autôrs dal catalic, e je stade posticipade a Zenâr. La esposizion e rapresente un omaç ae opare di Ciol, che e incjarne la anime profonde dal Friûl traviers la lûs, i paisaçs e lis musis de sô tiere e dal so imagjinari. Intun percors tematic che al passe plui di sîs decenis di produzion artistiche, si va dai ritrats innomenâts di Pier Paolo Pasolini e David Maria Turoldo ai fotograms dal cine “Gli ultimi”, fint aes fotografiis di paisaçs des planuris e dal Tiliment. (A.I.) – 18.12.2024
Foto di E. Ciol
