Cjase Cavazzini: la vite future si fâs cu lis plantis

Cjase Cavazzini, il Museu di art moderne e contemporanie di Udin, al ospite la mostre personâl di Antonio Bardino “Il respiro delle piante” (Il respîr des plantis), curade di Daniele Capra. Il progjet, unic intal panorame espositîf talian, al nas di une sinergjie tra istituzions, là che a vegnin a metisi dongje art contemporanie e la partecipazion coletive dai students. Il respîr des plantis al è costituît, di fat, di une mostre e di un program di colaborazions che al met tal centri i students: in chest câs, chei dal liceu classic “Stellini” di Udin. L’avigniment al è il prin episodi di “Future Life”, la vite future, il progjet che intai agns che a vegnin al sarà disvilupât dentri de gnove stanzie tal prin plan dal museu: une schirie di mostris personâls dai artiscj plui rapresentatîfs de creativitât contemporanie, clamâts a misurâsi cu lis propuestis tematichis de Agjende 2030 de Onu. Ven a stâi, soredut lavorâ lant daûr dai 17 obietîfs individuâts dal document pal aspiet de sostignibilitât ambientâl e dal benstâ socioeconomic. (A.I.) – 19.12.2024