Ancjemò une fuide di monossit di carboni a Triest, indulà che intune cjase a son restâts intosseâts vot di lôr.
Il fat al è sucedût îr vie pe gnot intun condomini di vie Torrebianca. L’alarme impiât intun bed&breakfast, che però al jere sierât e li dentri no jere int a durmî, al à tacât a sunâ metint in vuaite i residents dal imobil. Sul puest a son rivâts daurman i Vigjii dal fûc e il personâl dal 118. I valôrs dal monossit, misurâts daurman, a jerin alts tant che al è stât decidût di fâ jessi fûr lis cinc fameis presintis. Par vot di lôr che a vevin respirât il gas, i valôrs a jerin dut câs bas. Ducj i implants di riscjaldament dal edifici a son stâts distudâts e no podaran jessi impiâts fintremai cuant che no saran stâts fats ducj i controi par capî di indulà che al rivave il gas. (a.d.g.) – 08.01.2025
