A son stâts blocâts in Lombardie doi fraudadôrs che a vevin imbroiât inte nestre regjon. Il prin, Massimo Metelli di 51 agns, al è stât arestât inte provincie di Bressie: al veve publicât un anunzi indulà che al vendeve pellet a un presit pardabon bas. Intal tramai al jere colât un om di 40 agns di S. Zorç da la Richinvelde, che al veve mandât 600 euros su la Postepay dal delincuent par comprâ cuatri bancâi, che però no son mai rivâts.
Cun di plui, il furlan al è stât imbroiât une seconde volte cuant che al veve protestât par no vê ricevût il pellet e il fraudadôr i veve spiegât cemût vê indaûr i bêçs par dopo scuvierzi che al veve spindût altris 150 euros.
Il secont fraudadôr al è stât cjapât a Cernusco sul Naviglio: si trate di Alessandro Ferrari, 44 agns, puartât daurman in preson indulà che al varà di passâ cuatri agns, doi mês e 10 dîs pe fraude fate a Purcie intal 2022, cuant che al veve imbroiât un om di 31 agns disint di jessi un avocat. Ae vitime al veve contât che e jere stade denunziade par vê mandât messaçs a une fantate di 13 agns e che al podeve meti dut a puest paiant al pari de fantate 1.400 euros. (a.d.g.) – 08.01.2025
