A S. Denêl un mês di teatri amatoriâl

Il 2025 si vierç cul teatri amatoriâl a S. Denêl in graciis de rassegne “C’è teatro!” (Al è teatri!), inmaneade dal Grup di Art Dramatiche “Quintino Ronchi”, une compagnie teatrâl storiche dal teritori, che di agnorums e puarte lis filodramatichis regjonâls sul palc dal Auditorium Alla Fratta. L’apontament al tache ai 10 di Zenâr par cuatri vinars sot sere che a ufriran un cuadri interessant de sene teatrâl amatoriâl dal nestri teritori. La prime serade e viodarà in sene la Compagnie teatrâl di Ruvigne “Robic” cu la rapresentazion “Busedalôf”. La setemane dopo, la compagnie Lis Anforis di ‘Sevean di Bagnarie e presentarà il spetacul comic “Cocis e melons te sô stagjon”. Si va indenant ai 31 di Zenâr cu la compagnie Teatri Estragone di S. Vît dal Tiliment e ai 7 di Fevrâr si siere cun “Une volte… a S. Denêl”, un omaç al passât e aes oparis di Quintino Ronchi, Dree Sflacje e Pieri di S. Denêl. (A.I.) – 09.01.2025