Cjapât traficant di oms a Vilès

Vie pe gnot dai 26 di Dicembar, i carabinîrs de caserme di Vilès a àn intercetât inte zone industriâl dal comun une machine monovolum suspiete cun dentri siet personis. Dilunc dai controi al è saltât fûr che il vuidadôr, un om di 58 agns di origjin cinese che al jere resident in Sicilie, ma al viveve a Prato in Toscane, al stave puartant sîs conazionâi – cuatri oms e dôs feminis – di etât tra i 20 e i 55 agns, ducj imigrâts no regolârs in Italie.

L’om al è stât arestât cu la acuse di favoriment de imigrazion clandestine e puartât te preson di Gurize. I passizîrs, invezit, a son stâts denunziâts in libertât pal ingrès ilegâl in Italie e puartâts intai uficis de Cuesture di Gurize par fâ altris controi. (a.d.g.) – 09.01.2025