Incident pardabon strani vuê di matine a S. Zorç di Noiâr, li dal casel de autostrade. Tor des 10 e mieze un camion cul rimorchi che al jere jessût a fuarte velocitât de rotatorie pôc prime dal casel, forsit par cause de strade bagnade o par un erôr dal autist, al à fiscât lis barieris autostradâls blocant la jentrade in dôs puartis e tirant jù ancje il machinari dal telepass, la sbare e une telecjamare, cence par fortune fâ ferîts.
Sul puest a son rivâts Polizie stradâl, i mieçs di socors e i tecnics di Autostrade Alto Adriatico par meti dut a puest. Tal stes timp il trafic che al rivave di S. Zorç e dal teritori dongje al è stât deviât al casel di Tisane par cui che al veve di lâ a Vignesie e al casel di Palme par cui che al lave bande Triest. Nissun probleme invezit par cui che al veve di jessî fûr de autostrade. (a.d.g.) – 09.01.2025
