Il Friûl al à pierdût un dai siei mestris

Il Friûl al à pierdût un dai siei mestris de art, Nane Zavagno, muart a 92 agns inte sô citât, Spilimberc. In passe setante agns di ativitât, l’artist al jere deventât une figure di spic intal mont dal mosaic e de sculture, in particolâr pai siei studis puartâts indevant sul spazi e su la materie, la sô ricercje continue dal ecuilibri tra lis formis e i materiâi, inte sculture, inte piture, intal dissen o intal mosaic. Cuant che al jere ancjemò tant zovin, l’artist di S. Zorç de Richinvelde al à scomençât a elaborâ une concezion inovative de art dal mosaic, basade su la riscuvierte di materiâi “puars” tant che i claps di flum, doprâts pai “Rosoni”. Po dopo, a son rivadis lis sculturis tant che struturis realizadis cun laminis di alumini industriâl e rêt metaliche. Intal 2023 il Comun di Spilimberc i veve dedicât une grande mostre, deventade un spazi permanent cun dentri dutis lis fasis storichis de sô produzion artistiche, ma tantis sôs oparis a son presintis in colezions publichis e privadis, di Udin a Rome. Il so funerâl al è previodût miercus ai 15 propit dentri de mostre di Spilimberc. (A.I.) – 13.01.2025