A Gurize tal 2024 a son stâts fats plui matrimonis civîi che religjôs e tancj a son stâts chei cun forescj. In municipi a son stâts 81 i matrimonis, intant che la glesie e je stade sielzude nome di 15 cubiis, su la fonde dai dâts metûts a disposizion dal Comun.
A chescj a van zontadis dôs unions civîls. Simpri plui i forescj: dîs matrimonis a vevin almancul un dai doi coniugâts no talian, intant che a son stâts 14 i matrimonis indulà che om e femine a jerin forescj.
Cualchidun al à sielzût Gurize par sposâsi rivant fintremai de Svuizare, de France o dal Ream Unît. Un matrimoni ancje dentri de preson. Tal 2025 il Comun al regalarà aes cubiis une publicazion dedicade al palaç municipâl e al sarà plui facil sposâsi inte sale dal cont tal cjistiel. (a.d.g.) – 13.01.2025
