Tal Domo di Cividât un grup di sculturis dal 1200

L’avigniment al è epocâl: lis dôs sculturis di len clamadis “Dolenti” (Indolorâts), la Madone e il S. Zuan Evangjelist dal decim tierç secul, di proprietât dal Comun di Cividât, a saran colocadis vinars ai 17, aes 6 dopomisdì, aes bandis dal maestôs crucifìs di len dal Domo, fat tal stes periodi, par ricomponi un unic grup scultori cuntune bielece di no crodi. Ae cerimonie a parteciparan l’Arcivescul Riccardo Lamba, l’Arcipredi di Cividât Livio Carlino, il sindic Daniela Bernardi e cetantis altris autoritâts religjosis e civîls. Lis dôs sculturis a son dal Comun di Cividât e a vegnin dal Templut Langobart, dulà che a jerin colocadis su la alte trâf tignude sù des colonis che a separin la aule dal presbiteri. Par une vore di agns a son stadis conservadis tal Museu Archeologjic Nazionâl, po dopo a son stadis restauradis dal Pôl museâl dal  F-Vj e i lavôrs si jerin sierâts intal 2017. Stant che diviers studiôs e restauradôrs a vevin di timp evidenziât lis fuartis analogjiis stilistichis e tecnichis fra lis dôs sculturis e il Crist in crôs, di timp al jere tacât un lunc iter aministratîf che a Novembar 2024 al à permetût biadelore di otignî la autorizazion ae instalazion des dôs oparis in Domo par otignî un tritic medievâl di grande impuartance. (A.I.) – 15.01.2025