La stagjon di prose dal Teatri gnûf “Giovanni da Udine” e torne a tacâ vinars ai 17 cuntun spetacul che al è un omaç a un personaç di cult de culture pop dal Nûfcent: “Fantozzi. Une tragjedie”. Un personaç, chel dal resonîr Ugo Fantozzi, inventât intai agns Setante di Paolo Villaggio, che al è stât un osservadôr acût dal nestri timp e che al à savût contâ decenis di storie e di vite taliane traviers chês mascaris che al à savût creâ di grant atôr comic. Fantozzi e la sô femine Pina, Fracchia, Krantz, la fie Mariangela, i coleghis Filini, Calboni, la signorine Silvani a son dome ciertis des mascaris di une rinovade comedie de art che Paolo Villaggio al à creât par dâ vôs a une categorie umane jenfri oportunisim e tristerie, che si cjate fûr intal spetacul in sene a Udin, diret dal visionari Davide Livermore e cun Gianni Fantoni – l’erêt designât dal stes Villaggio – intal rûl dal resonîr vitime dai abûs di superiôr, coleghis e familiârs. (A.I.) – 15.01.2025
Foto di N. Creazzo
