Ancje la bancje Intesa Sanpaolo e à decidût di sostignî il progjet “Energjie gnove par Casa Via di Natale”, inmaneât de associazion Via di Natale Odv, che al ponte a rindi plui eficient l’edifici che si cjate a Davian e a riorganizâ i spazis internis dal stabil, che al da acet e al cure malâts oncologjics e lis lôr fameis. In graciis dai gnûfs implants fotovoltaics, la struture e rivarà a otignî plui autonomie e une riduzion dai coscj.
Si ponte a tirâ su’ 100 mil euros prime de fin di Avrîl. Par dâ une man, Intesa Sanpaolo e à decidût di cjapâ part ae racuelte di fonts donant doi euros par ognidun dai prodots comprâts dai siei clients in linie. Cun di plui, la bancje e met a disposizion un rimant indulà che si pues donâ bêçs.
Cun chescj bêçs al sarà pussibil meti a puest il cuviert che cumò al à pierditis, tornâ a fâ la centrâl e ancje l’implant fotovoltaic che al podarà cuvierzi fin al 70% dai consums dilunc dal Invier. Ogni an inte cjase di Via di Natale a cjatin puest passe 1.500 personis che a rivin di dute Italie e ancje dal forest par curâsi o par stâ dongje dai lôr cjârs, un jutori pardabon impuartant par cui che al à bisugne di curâsi intune struture di ecelence come il Cro, ma che nol rivarès a paiâ il cost di un albierc. (a.d.g.) – 15.01.2025
