Lezions di storie: Vignesie, la capitâl dal libri

A tornin a tacâ tal Teatri gnûf “Giovanni da Udine” lis fortunadis “Lezions di Storie”, une colaborazion tra Editôrs Laterza e Fondazion Teatri gnûf. La otave edizion – dedicade aes grandis capitâls culturâls e dentri intal percors di svicinament a Go! 2025 Nova Gorica e Gurize Capitâl europeane de culture 2025 – e propon par domenie ai 19 aes 11 di buinore “Vignesie e la albe dai libris”. Un incuintri cul gjornalist, storic e scritôr Alessandro Marzo Magno, autôr di cetancj libris di argoment storic. Vignesie e je stade un câs unic: alì si publicave la metât des edizions europeanis e i trê cuarts di chês talianis dai libris e li a son stampâts il prin libri grêc de storie (1486), il prin libri armen (1512), la prime Biblie in volgâr talian (1471), il prin Talmud (1520), il prin Coran in arap (1538), il prin libri di medisine ilustrât (1494) e il prin libri pornografic (1527). (A.I.) – 18.01.2025