Gnove rassegne par gjenerazions zovinis

Il teatri “Verdi” di Pordenon al è deventât la ‘cjase’ dai musiciscj zovins, a tacâ de Orchestre europeane zovine Gustav Mahler che in Istât e sielç di cualchi an propit cheste sale par preparâ il so spetacul. L’an al tache cuntune gnove rassegne, dentri dal program musicâl, dute dedicade aes gnovis gjenerazions, tirant dentri musiciscj zovins in dialic cun artiscj che a son ‘mestris’ innomenâts. La rassegne “Contrappunti”, di martars ai 21, al è un viaç ae scuvierte di gnovis personalitâts e di gnûfs sunôrs cun artiscj bielzà cognossûts e musiciscj zovins che a son daûr a formâsi in preseadis istituzions talianis e internazionâls. Il prin conciert al à dedicât aes percussions, cun l’ospit speciâl Fabián Perez Tedesco, sul palc cul duet formât di doi siei arlêfs, Marco Viel e Ivan Boaro. Ai 11 di Fevrâr al sunarà il grup di struments a flât dal Conservatori de Svuizare taliane, vuidât di Fabien Thouand. Ai 6 di Març, il zovin talent dal violin Nicola Di Benedetto cul pianist Alberto Ferro, protagonist intai teatris plui innomenâts. Par sierâ ai 23 di Avrîl une serade dute feminine cu lis sûrs Elisa e Giulia Scudeller Veronica Nava Puerto, Angelica Gasperetti e la pianiste Gloria Campaner, une des plui sflandorosis de sô gjenerazion. (A.I.) – 20.01.2025