Il ritrat di une stele dal jazz dut “fat in Friûl”

La stagjon musicâl dal Teatri “Pasolini” di Çarvignan curade di Euritmica e vierç il gnûf an martars ai 21 cun “My name is Nina. A portrait of Nina Simone”, il gnûf spetacul scrit di Valerio Marchi par contâ cun peraulis, musiche e imagjins la vicende umane e artistiche di une Nina Simone pôc cognossude. Al è il ritrat di une femine, artiste e combatente, cui siei tocs origjinâi e chei scrits di altris autôrs, che Nina e cjantave intai siei concierts fats in dut il mont, dilunc di une vite dificile, plene di sfrutament, solitudin e discomut interiôr. La icone dal jazz inte epoche des bataiis pai dirits civîi, la artiste che e veve sielt di cjantâ “pe sô int”, e ven contade di un progjet dut “fat in Friûl” prodot di Euritmica, cu la cjantante Graziella Vendramin, un grup di musiciscj di presi (Alessandro Scolz, Romano Todesco e Emanuele Donadelli) e l’autôr dal test Valerio Marchi al fâs il contadôr. (A.I.) – 20.01.2025