Al è stât cjatât muart intal dopomisdì di îr Ivan Regolin, om di 51 agns che al viveve a Grau intal condomini in vie Sant’Agata 10.
Il cuarp al è stât cjatât intal curtîl dal condomini e l’esam preliminâr fat sul puest dal miedi legâl al mostrave lesions che a podevin jessi leadis a une pussibile colade dal alt. Pal moment dutis lis ipotesis, ancje chê dal suicidi o di un incident domestic, a son sot investigazion.
A fâ clarece al sarà dut câs l’esam che al sarà fat tal obitori di Monfalcon indulà che al è stât puartât il cuarp inte sere sul tart. Sul câs a stan investigant i carabinîrs dal Nucli investigatîf di Gurize e de Compagnie di Monfalcon.
Regolin al jere une vore cognossût a Grau, no dome pe sô grande passion pe fotografie e i videos, ma ancje pe sô ativitât come sunadôr di bas intal duo musicâl Blue Age unplugged. (a.d.g.) – 20.01.2025
