Une orchestre de regjon a Rome pe Zornade de memorie

Inte suaze des ativitâts e dai memoreaments previodûts pe Zornade de Memorie, la Union des Comunitâts Ebraichis Talianis e organize ancje chest an il Conciert de Memorie, che si fasarà joibe ai 23 inte Sale Sinopoli dal Auditorium “Parco della Musica” dedicât a Ennio Morricone a Rome. Il conciert al sarà sostignût de Orchestre Abimà, une formazion triestine che di agns e sune partiduris di compositôrs ebreus e no, e che e rapresentarà il Friûl-Vignesie Julie al avigniment nazionâl, direte di Davide Casali, cu la partecipazion dal flautist Roberto Fabbriciani. Il conciert, in colaborazion cul Festival “Viktor Ullmann”, nassût intal 2014 a Triest par fâ cognossi la musiche dai compositôrs perseguitâts dal regjim nazifassist pe lôr origjin ebraiche e lis lôr convinzions politichis, culturâls e artistichis, al sarà acompagnât de leture di tocs curts gjavâts fûr di testemoneancis su la vite e la art musicâl. (A.I.) – 21.01.2025