Il Comun di Udin al onore l’inteletuâl udinês Tito Maniacco (1932-2010) a 15 agns de sô muart cuntun progjet organizât de Biblioteche “Joppi” in colaborazion cul Sisteme Bibliotecari dal Friûl e l’editôr Forum. Il progjet “Tito Maniacco. Faro nella nebbia” al è formât di doi avigniments che a ripassaran la opare e la atualitât dal scritôr, poete, critic, mestri, artist, ma soredut un inteletuâl ‘vêr’, atent ai aspiets de vite sociâl: une figure di valôr culturâl ecezionâl. Martars ai 21 aes 5.30 dopomisdì si tignarà la intitulazion a Maniacco de Sale Multimediâl de Biblioteche Civiche Joppi a Palaç Bartolini, tornât a vierzi dopo i lavôrs di ristruturazion. Po dopo, un incuintri a plui vôs, curât, introdot e moderât di Martina Delpiccolo, cui intervents di Angelo Floramo, Walter Tomada, Mario Turello. Intal atri di Palaç Bartolini e sarà vierte fint ai 16 di Fevrâr la esposizion bibliografiche “Archivi Maniacco”. Joibe ai 23, aes 8.30 sot sere inte Sale Corgnali de Biblioteche, leture seniche dal romanç “Mestri di mont”, dal libri di Tito Maniacco, cun Martina Delpiccolo e Fabiano Fantini. (A.I.) – 21.01.2025
Foto di D. De Marco
