Une rassegne di cines slovens a Pordenon

Sot dal segn di GO!2025, a Pordenon a rivin cuatri titui de rassegne dai cines slovens in Italie, curade di Kinoatelje. La rassegne e vûl sfidâ la percezion di confin tant che linie di division, pandintle tant che spazi di scambi e trame culturâl. Devant dai cambiaments politics in Europe, i cines selezionâts no si limitin a rifleti sul passât, ma a invidin a rifleti il significât pal presint e il futûr, passant lis divisions. Il prin apontament al è li dal Cinemazero martars ai 18 cun “Questa è una rapina!” (Cheste e je une rapine!) di Gregor Andolšek, une comedie dai ecuivocs. Si va indevant lunis ai 24 cun “Alpeadria Underground!” di Matevž Jerman e Jurij Meden. In Març e sarà la volte di “Lunatic” di Igor Sterk, storie vere dal velist Jure Šterk e “Cent’anni” (Cent agns) di Maja Prelog. (A.I.) – 17.02.2025