San Vito Jazz si vierç cu la musiche di Lou Reed

Al sarà The Leaping Fish Trio a screâ sabide al prin di Març la decime novesime edizion di “San Vito Jazz”, il festival promovût dal circuit dal Ert regjonâl e dal Comun, sot de direzion artistiche di Flavio Massarutto. Tal Auditorium Centri Civic, Paolo Botti (viole, dobro), Enrico Terragnoli (ghitare eletriche) e Zeno De Rossi (batarie) a fasaran un omaç a un musicist di liende, Lou Reed, interpretant sedi i siei tocs plui cognossûts sedi cierts mancul cognossûts, intun viaç insolit, ae ricercje di une musiche cence timp che e cjale simpri aes lidrîs. (A.I.) – 28.02.2025