Si scree il Museu “Joibe Grasse” dedicât ai ‘ribei’

Celebrâ il plui dramatic dai riviei popolârs adun cu lis storiis dai bandîts di ogni timp e ogni lûc nol è pôc. Domenie ai 2 di Març a Porpêt, aes 11 di buinore in vie Volta, si scree il Museu “Joibe Grasse”, che al tache su lis basis di chel nassût viers de fin dai agns Otante intun paîs dal Bas Lazi, condanât a sparî par jessi stât judicât in maniere injuste une cove di brigants. La idee e je chê di meti al centri la cognossince de storie e cun cheste ancje la condane di ogni violence: un lûc destinât al dialic, a sostignî la legalitât devant des continuis provis di pleâ l’interès public a vantaç di chel privât. Il percors espositîf al mostre il ribelisim traviers lis variis epochis cu lis sôs imagjins, lis letaris, lis armis. In bande dal museu a cjatin puest ancje une biblioteche cun miârs di tescj e une sale studi. (A.I.) – 01.03.2025