Bobby Solo al fâs otante agns! Chel che al è stât clamât “l’Elvis talian”, nassût a Rome tal 1945 di une famee di divignince furlane cul non di Roberto Satti, al fâs fieste martars ai 18 te sô cjase di Davian, li che al è vignût a stâ di cualchi an, cu la sô femine Tracy Quade e il fi plui piçul Ryan. Dongje de fieste, al ven fûr ancje un gnûf disc cul titul par talian che al zuie cui agns dal cjantant: “80 voglia di… Bobby Solo”. Il progjet dal disc e de fieste speciâl al è dal discografic e produtôr udinês Alberto Zeppieri, che al veve za fat doi albums e scrit cualchi toc cun Bobby Solo: un di chei al è “Une lagrime mi vise”, la version furlane uficiâl di “Una lacrima sul viso”, une vore preseade ancje di Mogol! A Udin, tal “Master Studio” di Max Passon, a son stadis regjistradis 16 cjançons: dôs par ogni deceni di vite dal re talian dal rock and roll, cun plui di cualchi toc dedicât al ‘mestri’ Elvis Presley. (A.I.) – 18.03.2025
36
