“Al continue la opare di sistemazion di ciertis des stradis de citât che plui e di plui timp a discjariin in cundizions di degrât, metint a pericul la incolumitât di automobiliscj e cicliscj”. Lu à anunziât a margjin de sentade di Zonte che si è tignude vuê il Vicesindic e Assessôr ai lavôrs publics Loris Michelini. “Si trate – al à sclarît Michelini – di intervents di manutenzion straordenarie che par chei al è stât aprovât vuê il progjet di fatibilitât tecniche e economiche e che a saran finanziâts par 230mila euro dal Ministeri dal Interni”.
Ogjet di intervent a saran la taronde ae intersezion tra viâl Palme, vie Melegnano e vie Pieri di Brazzà, i sotpàs che di plaçâl Cele a puartin in vie Puçui, vie Lumignà e vie Di Ascoli e la taronde di vie Boccaccio par ce che al tocje il setôr Sud Ovest de stesse e la rampe di imission inte tangjenziâl in direzion Sud.
“A son stradis a fuart traficait – al zonte Mcihelini – e che, propit par chest, di une bande a risultin esponudis a plui solecitazions, di chel altri a domandin di jessi metudis in sigurece a tutele dai une vore di citadins e pendolârs che lis passin ogni dì”.
Intal specific, il segn di Viâl Palme ogjet di intervent, sometût a alçâts volums di trafic pe funzion proprie de tiracje e il colegament trasversâl de citât, al presente une serie di vals e di dams dal tabâr stradâl, creant pericolositât al trafic in marcje. Ancje in plaçâl Cele e intes zonis limitrofis indicadis la pavimentazion e presente un stât fuart di degrât e al covente un intervent pe messe in sigurece dal trafic. Viâl Zuan Boccaccio e risulte lade jù invezit a cause no dome dal alçât volum di trafic e de funzion di colegament cul ospedâl e cul centri studis ma ancje par vie dal al frecuente passaç di mieçs pesants.
