Chê de Ucraine e je une vuere che plui di altris e je jentrade tes nestris cjasis. No passe zornade (miôr ancjemò minût) che o sin inzornâts su bombardaments, copariis, int che e scjampe. Tal nestri telefonin o viodìn fruts insanganâts par tiere, feminis che a vain, vecjos cui voi distudâts par vê pierdût dut e oms vistûts di soldâts che a bussin la famee prime di saludâle (forsit par simpri), maris che a àn viodût partî lôr fi par une esercitazion militâr e no san se al è ancjemò vîf.
La vuere e je dentri lis nestris cjasis pal leam che o vin di timp cun cetantis feminis ucrainis che, lassant la lôr famee (e dispès fruts piçui) tal lôr Paîs, a son vignudis in Friûl par lavorâ di badantis o massariis. Un grum di lôr a son ancjemò a stâ cun nô, altris a son tornadis te lôr cjase e nus clamin par fânus savê cemût che a stan o par domandâ aiût.
La vuere nus somee ancjemò plui dongje ancje parcè che tancj ucrains (massime feminis) cuant che a finissin inte television o sui social a fevelin par talian, nus contin ce che e sta sucedint li di lôr doprant une lenghe a nô cognossude.
E dute cheste int, in plui, e sta rivant ca di nô, dispès dome cuntune puare valîs. I plui “fortunâts” a àn bon acet li dai lôr fameis, chei altris cui sa la machine de solidarietât dulà che ju puartarà.
E cheste vuere (pensade cul cjâf dal secul stât) nus tocje di dongje ancje parcè che nus vise cetant che i Paîs a son leâts cu la economie di vuê e, come tal domino, cuant che al cole un toc di chê altre bande dal mont il sburt al rive ancje ca di nô. Tal zîr di pôcs dîs al mancje il fier e si inflamin i presits de benzine, dal gasoli, dal gas, de curint, dal pan… di dut.
Rossano Cattivello
La vuere e je tes nestris cjasis
589
1 coment
La uere je dentri lis nostris cjasis, no dome pe vie di Ukraine ma encje pe vie dal discomit creât da lis tecnoligjis mal dropadis e dal salt generazional, masse svuelt. No domi ueris ca si iodin ma ancje ueris ca cjapin cidinis. Il mont al é dut un torment di tecnologjis, di barufis, di inteligencjis artificiai, di busignis masse sbusadis o masse largjis, di diffarencjis culturai, di imberlament e inciussiment dal pinsîr, di pore di doman e di no rivà a viodi il doman pe vie di dute une scirie di robis liadis a ueris, pandemiis e migrations e tantis voris di umans no tant scletis.