A Lignan si scree le stagjon balneâr

6/05/2022 – Lignan el scree la stagjon balneâr 2022 domenie ai 8 di Mai aes 10.30. La cerimonie si fasarà daûr de tradizion a Terrazza a Mare, un dai simbui de localitât costiere furlane. Tancj i ospits che a àn confermât la proprie presince e che a saran dongje dal sindic di Lignan, Luca Fanotto, e dai operadôrs economics locâi premiâts pe ativitât imprenditoriâl sul teritori.
Ospit inedit al sarà il sindic di Klagenfurt, Christian Scheider: une presince che e rive dopo de formalizazion dal zimulament tra la citât carinziane e Lignan, fate intal 2021 par rinfuarçâ il rapuart di amicizie e colaborazion tra dôs realtâts che za a condividin tancj interès leâts al turisim. Lis restrizions dovudis ae pandemie no àn permetût, al timp, il scambi di visitis, tant che l’inviament uficiâl de stagjon a Lignan al è someât a ducj i doi i sindics une buine ocasion par cjatâsi e scambiâsi i augurs di buine stagjon. ADG