Une mostre par contâ i mosaics dal Friûl Vignesie Julie fasint cognossi lis bielecis dal teritori a cui che al vîf a New York. Il president de Regjon Massimiliano Fedriga e l’assessôr aes autonomiis locâls Pierpaolo Roberti a àn screât la mostre dai mosaiciscj furlans Stefano Miotto e Giovanni Travisanutto, inmaneade li dal Istitût talian di culture.
“Cheste mostre – al à marcât Roberti – no dome e impie lis lûs suntune des tantis ecelencis de nestre regjon intal cûr di une des metropolis plui impuartantis dal mont – dulà che par altri la olme dal Friûl Vignesie Julie e je ben presinte inte storie e inte atualitât cui tancj mosaics inte metropolitane – ma e vierç ancje a gnovis pussibilitâts di disvilup economic».
Roberti al à marcât ancje la impuartance des associazions dai coregjonâi tal forest “a rapresentin par cheste Aministrazion no dome che un patrimoni culturâl e storic, ma ancje un puint par facilitâ rapuarts economics e oportunitât di disvilup cui nestris emigrâts intes viestis di vêrs e propris ambassadôrs”. (A.D.G.) – 08.07.2022 – com
I mosaics furlans in mostre a New York
198