I turiscj a presein simpri plui il Friûl Vignesie Julie, ma…

Il Friûl Vignesie Julie al è une destinazion tant preseade da turiscj, ancje se penalizade di carencis infrastruturâls e struturis ricetivis no simpri ae altece. Chest al è il risultât di un scandai realizât di Demoskopica, presentât di PromoTurismoFvg. L’istitût di ricercje al à intervistât mil personis in dute Italie, par verificâ cetant che al sedi cognossût il teritori e scuvierzi i ponts debii e chei di fuarce. Daûr dai risultâts, il Friûl Vignesie Julie al sarès tra lis destinazions plui sieltis intal 2022, cuntun +4,3% di presincis e cressitis ancjemò plui fuartis, fintremai al 20%, a Lignan, Triest e Gurize. Secont il cuistionari, il 90% di cui che al è stât in feriis in regjon al vûl tornâ, ancje se la cualitât des struturis no convinç masse i turiscj. (A.I.) – 19.07.2022