Aziendis sanitariis di Udin e Pordenon multadis par violazion de privacy

Tratament ilecit di dâts personâi midiant dal sisteme informatîf di archiviazion des prestazions des Aziendis sanitariis dal Friûl Centrâl e Ocidentâl. E je cheste la acuse che e à puartât il Garant de privacy a multâ lis dôs aziendis cun 70.000 euros chê di Udin e cun 50.000 euros chê di Pordenon. Il Garant si jere ativât dopo di tantis segnalazions e reclams. Dai controi a son vignudis fûr tantis violazions dal Regolament european. I sistemis di acès ai dâts sanitaris no jerin configurâts in mût coret, cussì ducj chei che a dopravin il servizi intes dôs Aziendis (e in dutis chês de Regjon) a podevin acuisî informazions su cualsisedi pazient. Il Garant, di là des sanzions, al à imponût a Insiel di corezi il sisteme dentri di 60 dîs. (V.V.) – 27.07.2022