Par sostignî la ocupazion lis discriminazions no van ben

A coventin misuris inclusivis e no discriminatoriis stant a cetant sbocjât de Cort costituzionâl. Il segretari regjonâl de Cgil Villiam Pezzetta al comente cussì la sentence che e à sbocjât l’articul de leç omnibus dal 2021 sui incentîfs pes assunzions e lis stabilizazions.
“Dopo la enesime fermade dal criteri di residence, si spietìn che la Zonte regjonâl e la maiorance che le sosten a cjapin at che tes politichis dal lavôr nol è spazi par discriminazions, ma dome par misuris inclusivis che a judin la ocupazion e ducj i lavoradôrs tocjâts de crisi. Si trate duncje di voltâ pagjine, par concentrâsi in maniere esclusive su chei obietîfs di poie ae ocupazion come par esempli lis misuris varadis a nivel regjonâl, graciis ancje al confront tra l’assessôr e il sindicât”. (A.D.G.) – 03.08.2022