La mascotte dai europeans di nadâ e rive dal Friûl

Al è scomençât in maniere uficiâl il cont dai dîs che a mancjin pai Europeans di nadâ, in program a Rome dai 11 ai 21 di Avost. Spietant lis garis – indulà che a parteciparan i celescj ‘made in Fvj’ Piero Codia, Alice Mizzau e Matteo Restivo – al è tant Friûl ancje inte promozion dal apontament de capitâl.
Sui social, di fat, e je deventade famose Lea che, insiemi a Gastone, e je stade sielte tant che mascotte dal event. Lea e je une Golden retriever di vot agns che e vîf a Udin cui siei condutôrs, Marc Carlini e Alessandra Mennella. Cul so tabâr blanc intai mês passâts e veve batût la concorence e, cun passe 43 mil preferencis, e jere stade incoronade ‘santule’ a pari merit cul splendit Gaston, un terranova neri. (A.D.G.) – 10.08.2022