Robarie intun condomini a Udin vie pe gnot di Madone di Avost

Une bande di laris e à tamesât dut un condomini di Udin fasint grancj dams ma un piçul botin. Al è sucedût vie pe gnot di Madone di Avost a Udin, cuant che i malvivents a son jentrâts in azion intune grande palacine di viâl Volontari della Libertà, profitant de fuarte probabilitât di lavorâ cuasi cence fastidis. Al moment almancul 6 apartaments su 25 al risulte a sedin stâts visitâts dai laris: par jentrâ intes abitazions a àn scancarât puartis e sieraments e taiât tendis par fâ ombrene. Par passâ di un apartament a chel altri – fasint di mancul di sfuarçâ lis puartis blindadis plui solidis – i laris a àn scjavalgjât in dôs ocasions i parepets des teracis tal cuart e cuint plan. (A.D.G.) – 24.08.2022