Confcommercio e invide a studâ par proteste lis lûs

L’invît, ancje inte ex provincie di Udin, al è di studâ lis lûs des ativitâts dal terziari par 15 minûts, tacant dal misdì di miercus ai 31 di Avost.
La propueste e rive dal president di Confcommercio nazionâl Carlo Sangalli che al anticipe simpri pe matinade di miercus une conference stampe a Rome, inte sede confederâl, sul impat dal cjar-energjie, adun cun ANCD-Conad, ANCC-Coop e Federdistribuzione.
E sarà la ocasion, al sclarìs Sangalli, “par esponi ae politiche e aes istituzions domandis e propuestis par fâ front ae cressite dal cost de energjie”. Lis lûs distudadis, al sclarìs il vicepresident nazionâl e president provinciâl di Udin Giovanni Da Pozzo, “a saran un at simbolic. La energjie cjare e je un dam enormi pes ativitâts che a stevin a pene ripiantsi dopo la emergjence de pandemie”. (A.D.G.) – 31.08.2022