La Danieli e costruirà in Olande un gnûf implant siderurgjic a idrogjen

Pe industrie di Buri une gnove comesse in Olande. Tata Steel Netherlands, imprese olandese controlade dal colòs siderurgjic indian, e à sielt il grup furlan, adun cun Tenova, tant che compagn tecnologjic pal progjet Heracless (Hydrogen-Era-Carbon-Less), cul obietîf di fâ passâ la açalarie integrade di IJmuiden di une tecnologjie BF a une produzion di açâl vert a base di idrogjen, duncje plui sostignibil.
Il contrat cun Energiron Alliance (Danieli – Tenova) al previôt une prime fase inzegneristiche, dal valôr di 65 milions di euros, e po dopo une implantistiche, di plui o mancul 500 milions. (A.D.G.) – 01.09.2022