Centenârs i candidâts ae prove di amission par Medisine a Udin

A son 467 i aspirants medics che ai 6 di Setembar a parteciparan ae prove di jentrade che la Universitât dal Friûl e à inmaneât te sede dai Rizzi. Ben 148 i puescj a disposizion in Friûl. L’apontament al è aes 10 di matine, la jentrade e sarà fate su la base dal cognon intant che a son previodûts doi varcs di acès diferents: par chei nassûts dal 1971 ai 22 di Zenâr dal 2003 bisugne lâ alì dal G2; ducj chei altris – gjavant cualchi câs che a àn vût indicazions specifichis – a dopraran il varc G3. La prove e durarà 100 minûts e e scomençarà ae 1 dopomisdì. I candidâts a varan di rispuindi a 60 domandis, cun cinc opzions di rispueste, su argoments di biologjie (23 domandis), chimiche (15), fisiche e matematiche (13), resonament logjic (5), competencis di leture e cognossincis cjapades sù intai studis (4). Nol è obligatori presentâ il green pass, ma bisugne meti la mascarute Ffp2. A Triest a son 619 aspirants par 180 puescj, ma 204 candidâts de provincie di Pordenon a fasaran la prove inte fiere de capitâl dal Friûl ocidentâl. (A.D.G.) – 02.09.2022