Doi dîs a Udin par dâ rispuestis ae Sanitât nazionâl

Digjitalizazion, inteligjence artificiâl, gnovis tecnologjiis e progrès a 360 grâts par une sanitât in evoluzion, clamade a rispuindi simpri miôr aes esigjencis dai citadins, massime daspò il Covid. Il rilanç necessari dal Sisteme sanitari nazionâl vuê si zuie dut su la ricercje sientifiche e su la capacitât di inovazion tecnologjiche: lu sa ben la Universitât di Udin, che propit a chescj temis e dediche doi dîs di cunvigne internazionâl, “Sense of Science”, vinars ai 9 e sabide ai 10 intal palaç de Regjon. In program, une largje voglade sui disvilups de ricercje sientifiche in Italie intai agns che a vignaran e su lis inovazions chirurgjichis e tecnologjichis intal cjamp des malatiis cardiovascolârs, cun relatôrs di innomine mondiâl: sienziâts, clinics, chirurcs, tecnics, tant che il president dal Istitût Superiôr di Sanitât, Silvio Brusaferro. (A.I.) – 06.09.2022