Ploie intense e je in cors di cheste matine sul Friûl Vignesie Julie, in particolâr sul Friûl orientâl. Un diluvi violent al è vignût jù su Gurize, tra lis 9 e lis 11, ma no si regjistrin domandis di intervent. Câl brusc des temperaduris in mont, soredut in Valcjanâl.
La fasse plui colpide de perturbazion e je stade chê dilunc dal flum Lusinç, cul nivel de aghe che, soredut inte zone di Segrât, si è alçât tant, sedi pe bondante ploie des ultimis oris sedi par vie de viertidure di une dighe in Slovenie.
E propit de plene dal Lusinç cheste matine al è stât salvât un migrant di 35 agns, che al veve passât la gnot bivacant sot un dai pilons dal puint de regjonâl 305, tra Gardiscje e Segrât. Tor 9, un passant al à clamât il 112 viodint il forest in dificoltât. Il nivel dal flum si jere alçât une vore e l’om al jere restât blocât, cu la aghe che e jere daûr a lâ sù in curt. Intervignûts i pompîrs di Gurize che lu àn salvât. (ADG) – 16.09.2022
Om salvât de plene dal Lusinç in graciis dal intervent dai pompîrs
190
