La Regjon e stanzie 2,8 milions di euros pai Edr

Altris fonts, plui o mancul 2,8 milions di euros, a saran assegnâts de Zonte regjonâl pai bisugns segnalâts vie pa l’an dai Ents di decentrament regjonâl (Edr). Al è un piçul justament a pet dai impuarts za stanziâts e assegnâts a fin 2021 e intal cors dal 2022.
Lu fâs savê l’Assessôr regjonâl aes Infrastruturis, Graziano Pizzimenti, precisant che 1,625 milions a saran doprâts pe realizazion di intervents di manutenzion straordenarie (in particolâr 1,125 milions di euros pal Edr di Udin e 500 mil euros par chel di Pordenon) e 1,2 milions a saran doprâts pes spesis di manutenzion ordenarie dal Edr di Pordenon. Dal prin Zenâr 2022 lis competencis di progjetazion, realizazion, espropriazion, manutenzion, gjestion e vigjilance intal setôr de viabilitât, a son dai Edr su la rêt regjonâl locâl.
Inte Sierade 2021 a jerin stâts assegnâts ai Edr 49,5 milions par spesis di invistiment pes oparis di manutenzion straordenarie e 15 milions di part corinte pes spesis di manutenzion ordenarie. A chestis risorsis si son zontâts 6,9 milions a Març 2022 par altris intervents di manutenzion straordenarie. (ADG) – 19.09.2022