Al è ancje il furlan tra lis lenghis sieltis de Comission Europeane par celebrâ chest an la Zornade europeane des lenghis. Un apontament che al và indevant dal 2001, ai 26 di Setembar, e al vûl valorizâ la impuartance de diversitât linguistiche e promovi l’aprendiment des lenghis.
Intal 2022, An European de Zoventût, la Comission e à sielt di pontâ sul web, cuntun video speciâl, publicât propit vuê, dulà che al à clamât a racuelte i siei zovins par che, intune grampe di minûts, a sclarissin ce impuartance che al à par lôr la lenghe mari e in ce mût che al à influençât la vite. Al è vignût fûr un “viaç” de Svezie al Portugal e de Estonie ae Spagne, passant pal Friûl, rapresentât pe ocasion di Federico Benedet, un dai Youtuber dal canâl de ARLeF, YoupalTubo.
Il fantat di Fane al sclarìs intal video cemût che par lui il furlan al rapresenti un leam tra lis gjenerazions che lu àn precedût e chês che i laran daûr. “Inte mê famee – al conte in marilenghe, cun sottitui in inglês – si è fevelât simpri la lenghe dal teritori. O fasarai il stes cun miei fîs, par che a capissin di indulà che a vegnin e a vedin fuartis lidrîs”. (ADG) – 26.09.2022
