Confidi Friuli al strenç un pat cun Confapi Fvg, Confcommercio Udine e Confindustria Udine par favorî l’interès des impresis su la produzion di energjie di fonts rinovabilis.
“Il dificil moment che o stin passant al impon di acelerâ il cambiament”, al è il resonament des associazions di categoriis che a àn condividût i contignûts de convenzion cui presidents Massimo Paniccia (Confapi Fvg), Giovanni Da Pozzo (Confcommercio Udine) e la vicepresident Anna Mareschi Danieli (Confindustria Udine).
Intal concret, si previôt il supuart dal acès al credit par invistiments ancje traviers la emission di prodots e struments finanziaris di garanzie pe realizazion di progjets che a ridusin il consum energjetic e a favorissin la produzion di energjie di fonts rinovabilis. “Confidi Friuli – al declare il president Vida – al è pront a dâ cuviertiduris fin al 80%”. Par sostignî la licuiditât di impresis e libars professioniscj in dificoltât par vie dai auments de energjie, Confidi Friuli al à previodût cun di plui la concession di garanziis pai finanziaments rateâi fin a 50 mil euros. (ADG) – 29.09.2022
