Intes setemanis passadis i agjents de Polizie stradâl di Pordenon, presints in “borghês”, adun cui funzionaris de Motorizazion a un esam teoric par cjapâ la patente B, a àn scuviert dôs feminis che a cirivin di jessi promovudis barant.
I agjents a son stâts insospetîts dal compuartament strani des candidadis e dal vistiari che a metevin, che al veve une insolite sglonfadure. Lis dôs feminis a jerin tant gnervinis e dispès si metevin a puest il cuel de gjachete, cuasi a volessin platâ alc. Ae fin dal esam, alore, lis candidadis a son stadis invidadis dai agjents a consegnâ i gjubots.
A chest pont la scuvierte. Lis zovinis, prime di presentâsi al esam, a vevin platât dentri dai gjachetons une microtelecjamare, che e permeteve di inviâ lis imagjins des domandis di esam a cualchidun e un microfon a batarie par comunicâ cul esterni. Lis rispuestis a vignivin dadis di un compliç aes candidadis che a dopravin un auricolâr. (ADG) – 30.09.2022
Esams de patente cul truc: denunziadis dôs feminis a Pordenon
223
