Une serade di alte mode a Udin

Rimandade ai 30 di Setembar par vie dal brut timp, martars ai 4 aes 8.30 di sere al torne un dai avigniments plui spietâts di fin Istât, la Udine Fashion Night. La grande sfilade di mode, volude e inmaneade di Barbara Beltrame e Anna Mareschi Danieli, si prepare a intenzi place Libertât cui colôrs plui biei di vistiîts di nuvice, alte mode e mode pronte. In mostre plui di cent vistîts di nûf marchis di ecelence che a àn fat la storie dal Friûl, contribuint a puartâ alt il non di cheste tiere traviers la proprie creativitât e il lavôr artesanâl. Dute la sfilade, cun ospite straordenarie Gabriella Carlucci, e sarà mandade in direte tv su Telefriuli. (A.I.) – 03.10.2022