Pozzo al smire al scudet dopo une pate che e vâl dopli

Rimonte dal Udinês inte gare ad alt cuintri la Atalanta al stadi “Friuli”, cuasi dut plen. Tantis emozions e une partide di caratar e cualitât, cu la scuadre di Sottil lade sot par dôs voltis, e l’ex Muriel che, come simpri, si discjadene devant di chei che a son stâts i ‘siei’ tifôs. Po dopo, ancje in chest câs al bisugne dî ‘come simpri’, a son rivadis lis corezions dal tecnic e intal finâl il gol spetacolôs di Deulofeu, chel de pate di Perez e un risultât che al è fintremai stret pai blancs e neris, che dopo il 90° a son lâts dongje dal 3-2. Un pont pesant, che al vâl cuasi dopli pal valôr dal aversari, e che il president Gianpaolo Pozzo al à comentât cussì ae radio nazionâl: “Dopo 9 partidis, dutis convincentis, o podìn dî che o vin une siore scuadre e ancje un grant alenadôr. Pal scudet, chest an, o sin in corse ancje nô”. (A.I.) – 10.10.2022