Si podarà contâ su 12 i milions pal recupar de ex Amidarie Chiozza di Parteulis di Rude. Su la base des gnovis propuestis indenant, il Ministeri de Culture al à continuât di fat a sostignî i progjets presentâts dal Comun aprovant un gnûf finanziament dal valôr di 4 milions e 500 mil euros, bogns pal recupar dal patrimoni di archeologjie industriâl.
“La visite dal Ministri Dario Francescuini di qualchi dì indaûr – al comente il sindic di Rude Franco Lenarduzzi al è stât un atestât di grant onôr al lavôr e ai programs fats dal Comun e al testemonee che i sfuarçs fats a son pardabon impuartants e ritignûts a plen in linie cui cronoprograms dai protocoi ministeriâi. Chest ultin contribût di 4,5 milions si sume a altris invistiments statâi impuartants: 4,8 milions vûts dal Comun di Rude e 1,8 milions in delegazion aministrative dal Segretariât de Sorintendence. I bêçs disponibii a servissin a fâ il museu e a rilançâ dute la aree metintle a disposizion dal teritori par ospitâ ativitât di terziari indenant”. (ADG) – 18.10.2022
