Strente su Borc Stazion, teatri intes ultimis setemanis di un numar cressint di fats violents. L’ultin, intal dopomisdì di martars, al à fat scjas particolâr, dal moment che, inte barufe tra une dozene di oms, in vie Leopardi, al jere restât ferît, in mût lizêr, ancje un agjent de Polizie locâl.
Vuê la Cuesture e à comunicât l’arest di cuatri dai forescj coinvolts e la denunzie di une cuinte persone, dopo vê ricostruît il fat tacant des 3 dopomisdì, cuant che i doi grups – probabilmentri par motîfs di droghe – si jerin frontâts. Un dai partecipants al jere scjiampât e si jere rifugjât intal puest de Polizie locâl, intant che chei altris, ae rivade des patuliis de Polizie di Stât, dai Carabinîrs e de Polizie Locâl, si jerin dâts ae fuide intes viis dongje. (ADG) -21.10.2022
