La Polizie di Stât e la Procure di Pordenon a àn sbaraiât un maxi-imbroi di trading in linie. La organizazion metude impins di une bande albanese, midiant call center e server dedicâts, e rivave a convinci lis vitimis – diviers centenârs di citadins talians – a invistî bêçs, par un zîr di afârs stimât in cualchi desene di milions di euros.
Il Procuradôr cjâf di Pordenon Raffaele Tito e il Procuradôr speciâl cuintri la coruzion e il crimin organizât Spak di Tirana Ened Nakuçi a àn concludût la ativitât investigative che e à puartât a trê misuris cautelârs cuintri ancjetancj citadins albanês a cjâf de struture criminâl.
Si stime che la organizazion e vedi fraudât diviers centenârs di citadins talians residents in dut il teritori nazionâl par palmancul lui di trê milions di euros, ma probabilmentri al è dome che la ponte dal iceberg.
Lis vitimis, clamadis par telefon, a vignivin convinçudis a invistî cifris prime tant bassis, che, però, al someave a garantissin rindiments stratosferics. Intal cors di plui di 42.000 intercetazions telefonichis fatis dai investigadôrs talians, al è vignût sù che i trufadôrs a jerin une vore abii intal ûs di veris e propriis tecnichis di persuasion, al pont di convinci citadins ignorants a meti, intal timp, svariadis centenârs di miârs di euros su conts corints forescj. (ADG) – 26.10.2022
