Pai progjets strategjics 32 milions di euros de Regjon

“La Regjon e fasarà cui soi bêçs i progjets strategjics pal Friûl Vignesie Julie che no son stâts cjapâts dentri tra chei di podê finanziâ de programazion dal Pr Fesr 2021-27. A son sîs iniziativis che a van dal cjamp de salût a chel de difese, dal pericul idrogjeologjic fin al smart working, che a vignaran disvilupadis cuntun stanziament di 32 milions e 790 mil euros”.
Lu à precisât vuê l’assessôr aes Financis, cun deleghe ae Programazion europeane, Barbara Zilli dilunc de sentade de V Comission clamade par esprimi un parê su la deliberazion de Zonte regjonâl che, ai 20 di Otubar passât, e à aprovât la liste des propuestis progjetuâls strategjichis pal 2022. (ADG) – 26.10.2022